Unsa man ang mas bililhon ang salapi o ang tawo? Ideal gyud unta kun ang tawo ang atong hunahunaon. Apan ang buhing matuod nagtudlo nga mas daghan kanato ang nipalabi sa salapi ug bahandi kaysa tawo. Kay ang rason mao nga dili ta buot nga mamahimong mag-antos sa hilabihan.
Dili nato malimtan ang giingong
24 sa 437 ka mga pinili ug tinudlo nga mga opisyal sa gobyerno nga nagpadayon
nag-atubang karon og kasong kriminal tungod sa alegasyong nalambigit sa
anomaliya sa pagpanghatag sa Social Amelioration Program (SAP). Mga 437 ka kaso
nga gisang-at sa nagkadaiyang Prosecutor's Office sa Department of Justice
(DOJ), 203 niini mga elected public official.
Naglakip ang mga nahisgutan sa
mayor sa munisipyo, konsehal sa siyudad o munisipyo, barangay kapitan, barangay
kagawad, Sangguniang Kabataan chairmen ug SK kagawad. Samtang ang 102 mga
personahe sa barangay ug sa siyudad, naglangkob sa mga barangay secretaries,
barangay treasurers, barangay health workers, homeowner's association officers,
purok leaders, city/municipal Social Welfare and Development Officer, SAP
enumerators ug day care teachers samtang ang 132 mga sibilyan o
co-conspirators. Sa pag-apud-apod sa hinabang, nahitabo ang kaguliyang kay
daghan ang nagsulti nga wala sila giapil sa listahan samtang ang uban nga
haruhay ang kahimtang gihatagan, tungod suod sa tiglista ug duol sa dughan sa
kapitan.
Kanunay pud nato madunggan sa
balita kining mga tawo nailad sa mga money investment scheme. Hangtud karon di
pa mapapas sa hunahuna sa mga investors ang kalagot ug pagmahay. Daghan na sab
ang nakadawat sa hitabo kay lagi suma pa, nga niadto pa kuno, nasayod naman
sila nga sugal kini. Busa, midawat sila. Pero kadtong mga nangutang tawon ug
namaligya sa ilang mga propedad, hangtud karon wa kadawat sa hitabo.
Sa dihang nasayran nga naa sa
kustodiya sa NBI-Davao ang founder sa Rigen Marketing human niadtong Oktubre
22, 2020 gidala sa buhatan sa National Bureau of Investigation (NBI) sa Davao
City gikan sa Metro Manila ang usa sa mga founder niini nga si Rico Garcia,
taman nalang sa social media ang pagpabuhagay sa kalagot sa mga investors.
Sa mga gipangkasohan mga
opisyales sa Philhealth, sagad nagpa-confine sa mga tambalanan human gitaral sa
senado ug gituki tinuod ba nga sila nakig-kunsabo aron hakpon ang bilyon nga
kwarta sa PhilHealth, pundo sa mga kabus panahon nga sila dad-on sa tambalanan
kon maglain ang pamati sa kalawasan.
Ilang gibayaran sa matinud-anon
ang kontribusyon sa PhilHealth, giuna kay sa ubang panginahanglan sa panimalay.
Miawop ang kahayag alang kanila, karon sila nagasinggit sama sa uban panahon sa
eclipse nga "balik ang kahayag" kay nagtoo nga gitukob sa bakunawa
ang bulan. Ang kwartang gikawkaw mabalik pa ba kaha?
Unta sa madali makasugod na ang
imbistigasyon ug mapahamtangan na og silot kung mamatud-an, imbarguhon ang
ilang mga kabtangan, yawat nalang dunay tipik sa kinawkaw nga kwarta ang
mabalik alang sa katawhan. Kalooy sa mga OFW nga dili makagawas sa nasud kung
dili makabayad sa ilang paggikan kay mahimong babag sa paggawas, mobayad nalang
bisan dili nila matagamtam ang serbisyo sa PhilHealth kay wala didto sa mga
nasud nga ilang adtuan.
Kanus-a a kaha mahimong tinuod nga gawasnon ang mga Pinoy sa kurapsyon? Daghan nang presidente ang misaad nga putlon ang kurapsyon, kadaghanan kanila mipanaw na, ang kurapsyon naghitak pa.
