CHRISTMAS STAR MAKIT-AN NA PUD

 Karong tuiga lahi gyud ang atong pagsaulog sa Pasko. Tungod bawal pa man ang pundok-pundok o tapok-tapok. Dili kita makahimo og Christmas gatherings aron magsaulog sa Pasko uban sa atong pamilya. Wala pud Christmas carolings. Apan makaingon pud ta nga adunay mga tilimad-on nga nag-tan-aw gyud nato ang Ginoo sa atong mga kagul-anan.

Kay karong umaabot Disyembre 21, 2020 usa ka talagsaong panghitabo ang mahitabo didto sa kawanangan. Magtupad kun mohimog alignment ang duha ka planetang Saturn ug Jupiter. Kini susamang panghitabo nga nahitabo niadtong Pasko nga nahimugso ang Emmanuel kun ang Dios nga nagpakatawo niadtong 2000 na ka tuig ang milabay.

Tungod niini, ang panagtagbo sa duha ka mga planeta makapahimugso sa Christmas Star. Mahitabo lang kini matag 800 ka mga tuig una mobalik. Ang Christmas Star giingon sa  Simbahang Katoliko ingon nga giya sa mga maalamon sa ilang pagpangita sa Mesiyas. Ang bitoon maoy ilang lamdag sa ilang panaw padulong sa dapit sa nga nahimutangan sa ilang giisip nga tinuod nga kahayag ug tinuod nga hari inga walay lain kondili ang atong Ginoong Jesus ang hari sa tanang mga hari. Hugot akong nagtoo gidungog gyud ang atong pag-ampo sa Oratio Emperata uban sa Simbahang Katoliko. Dili lang gyud kita magpakawala sa paglaum.

Sa atong pagpuyo ning kalibotana, dunay mga higayon nga anaa kita sa mga kangitngit. Tingali makaingon kita nga mangitngit ang atong panaw niining tuig 2020 gumikan ning dakong pandemiya sa COVID19. Makamingaw baya nga dili nato madunggan karong tuiga ang mga huni ug awit sa pasko gikan sa mga manaygonay nga mag house to house nga naandan na nato kini sukad pa kaniadto. Karon dili na kini mahitabo tungod sa mga health protocols gumikan sa Covid-19 pandemic. Gawas sa daygon, giawhag usab ang tanang establisemento nga dili lang mopahigayon og Christmas party. Padayon kita sa pag-ampo ug padayon gihapon kita sa pag-amping ning panahon sa dakong kalisdanan.

Dia pay laing tilimad-on giingon nga wa mahibaw-i sa kadaghanan nga may bakuna na kuno batok sa COVID-19 sukad niadtong Enero 13, 2020. Duha ka adlaw human gipagawas sa China ang genetic sequence sa kagaw nahuman sa mga siyentipiko sa Moderna ang bakuna nga napamatud-an nang luwas ug epektibo. Namugna ang bakuna usa ka semana sa wa masusi ang labing una nga kaso sa COVID-19 sa Estados Unidos. Mas una pa kay sa pagbakwi sa gobiyerno sa China sa ilang nahaunang pasalig nga way human to human transmission sa kagaw.

Human lang sa usa ka buwan, nakapada na ang Moderna og doses sa bakuna ngadto sa National Institutes of Health sa Estados Unidos alang sa pagsugod sa ilang Phase 1 clinical trial. Mao ni ang samang bakuna nga unang ginganlan og mRNA-1273 nga nakaplagan sa niaging buwan nga 94.5% nga epektibo. Kung tinuod ni, nagamit na unta dayon dihang namugna ang bakuna aron dili mudaghan ang minilyon ka molupyo nga nangasakit ug nangamatay sa COVID-19 sa nagkalainlain nga kanasuran sa kalibotan.

Nakasugod na baya ang Department of Health (DOH) sa Pilipinas sa inadlawng tracker sa mga kaso sa COVID-19 niadto nang Enero 29, 16 ka adlaw human namugna ang bakuna, kanus-a wa pay bisan usa ka confirmed case sa Pilipinas. Karon, sa uwahing datos nga gipagawas sa Department of Health –Central Visayas dunay 24,397 total cases sa COVID-19 diin 825 ang active cases; 22,177 ang recoveries ug 1,395 ang deaths.

Sige lang naa lagi Ginoo- ang miabot nga Mesiyas sa Pasko. Manaygon lang hinoun ko sa tanang nagsunod sa akong lindog dinhi sa BBDN. Akong pangayoon nga sundon lang gyud ang tanang health protocols aron mawala na kining COVID19 sa Pilipinas apil na sa tibuok kalibutan. Maayong Pasko!

TUNGOD SA DUGAY-DUGAYNG ULAN

 Mipagawas na og deklarasyon ang Police Regional Office-7 nga walay tulobagon ang kapulisan ug ang mga opisyal sa lungsod sa Madridejos, Bantayan Island, Cebu sa wala pagtuman sa social distancing niadtong Nob. 27, 2020 atol sa Suroy-Suroy sa Sugbo didto sa Kota Park, Madridejos. Ang gibasihan ni PRO-7 Director, Brig. Gen. Ronnie Montejo sa iyang deklarasyon nga nagtapok ang mga tawo sa suroy-suroy sa Madridejos tungod sa dugay-dugay nga uwan. Kini nagbase sa “investigation report’ nga gisumitir ni Cebu Provincial Police Office Director, Col. Aladdin Collado.

Atong mahinumduman human migawas sa social media ang mga hulagway nga daghan ug nagsikit ang mga nanambong nga gisaway og maayo sa mga netizen tungod kay wala motuman sa social distancing, mi-order dayon si Interior Secretary Eduardo Año nga imbestigahon ang maong kalihokan. Mihimo pud og nilaing imbestigasyon ang DepEd7 pinaagi ni Regional Director Salustiano Jimenez, nga pahamtangan ang mga responsable nga mga maestro. Ang DepED-7 mipahigayon  og pakisusi tungod kay dunay mga batan-on nga nagsul-ob og uniporme sa eskuylahan nga miapil sa maong kalihokan.

Kasagaran sa mga mitan-aw sa video sa Youtube nakaingon walay uwan ang maong kalihokan. Sukwahi sa report ni Brig. Gen. Ronnie Montejo kay nagpundok ang mga nanambong ilawom sa mga tent tungod sa kainit sa panahon. Naa pud laing miingon basin lang sad kon ang nagvideo o naghulagway miundang sa dihang miuwan. Kinsa kahay nagtug-an sa tinuod? O duna ba kahay gihimong pag cover up alang sa mga dagkong opisyales sa wala pagtuman sa social distancing?

Sa laing bahin ang mayor sa Madridejos nga si Mayor Salvador dela Fuente mipagawas sa iyang panghambog nga COVID19-free ang iyang lungsod. Ang bugtong lang gibasihan niya sa iyang panghambog  tungod kay walay nahibaw-an nga dunay nasakit sa Covid-19 sa maong lungsod.  Angay nga magpasalamat ta kon ugaling tinuod ang gisulti sa mayor. Gani, manghinaut ta nga walay masakit sa Covid-19. Kay didto raba sa maong kalihokan sa suroy-suroy sa Madridejos mao si Sec. Harry Roque, Presidential Assistant Mike Dino. Pagkadako gyud sa problema sa atong mga dagkong opisyal sa atong nasud. Naa ra ba pud intawon didto ang mga kandidata sa Miss Universe. 

Dinhi sa atong lalawigan sa Bohol, sukad sa pagsugod og pagpanghasi sa coronavirus disease (COVID-19) dinhi sa Bohol, giingon sa Bohol Inter Agency Task Force nga upat na lamang ka lungsod ang nagpabilin nga wala pay kaso sa nahisgutan nga sakit bisan sa wala pay undang nga pagpangdawat sa ilang mga molupyo nga nanguli gikan sa bisan asa nga dapit sa gawas. Segun sa napakita nga COVID Case Map sa, Disyembre 5, 2020, ang mga kalungsuran na lamang sa Dagohoy, Gundulman, Sevilla ug Valencia and wala makasuway og nagpositibo sa kaso sa COVID, human sa walo ka buwan og tunga.

Samtang mingtala na ang Bohol sa napulo ug lima ka tawo nga namatay tungod sa nahisgutan nga sakit. Sila gikan sa Buenavista, Ubay ug Calape, Danao, Garcia Hernandez, Panglao, Trinidad, San Miguel, Bien Unido ug Corella. Niining ulahing mga adlaw, sa Sierra Bullones diin nataho ang labing bag-ong local nga pagpanakod, kawhaan og walo na ang nanga-ayo samtang sa Candijay, kawhaan ug unom usab ang na-ulian na sa sakit.