Ang tambag ngadto sa mga tawo gikan sa kadagkoan sa mga local government units ang bakuna ray makapabalik sa normal. Giingon nga sa dayon hinapos sa Disyembre, nag double digit og balik ang mga pagpanakod sa coronavirus disease dinhi sa atong nasud. Apan matud sa IATF ubos ra gihapon kini itandi sa miaging mga buwan. Sa ubang mga nasod nasudlan og laing matang sa kagaw o lain nga strain sa Sars-CoV-2, paspas nga misaka pagbalik ang mga kaso ug mas makamatay. Kuyaw ra ba masudlan ang nasod ani nga matang sa kagaw. Ang rason kon nganong ang Sulu nanirado sa iyang border kay duol sila sa Malaysia nga naa na aning mao nga strain.
Lahi pud ang tan-aw sa mga
tigpaniid ngadto sa atong mga policymakers sa nasud. Kuno, ang ilang desisyon
sa mga health protocol aron sa paglikay sa Covid 19, way klaro. Sa iningles pa
‘inconsistent’. Sama aning ilang pagdili nga magtapoktapok. Ilang gidili ang
mass gathering sama sa pagpanaygon, Christmas parties, re-unions. Bisan man
gani ang karaoke ug videoke sessions. Apan ilang gitugot ang Misa de Gallo
niadtong Disyembre. Dili pa lang dugay, gipahibawo ni Presidential Spokesperson
Harry Roque nga gawas sa face mask, gikinahanglan nga mag-face shield pa aron dili
gyud matakbuyan sa virus. Apan ang Department of Health (DOH) nagkanayon nga
dili maayo ang pagsul-ob og face shield labi pa kadtong maglisod og ginhawa.
Unsa may resulta ani? Tungod sa
kadaghan sa ipatuman maglisod na tag desisyon kon hain niini ang husto ug hain
ang sayop. Sama nga gimanduan kita nga dili magtapok-tapok pero kon taga
gobiyerno ang magtapok, okey ra basta naay face mask. Nagsugod tag kalibog unsa
sila ka insakto nga mamugos kanato sa protocol. Unya gimanduan kita nga mag
sul-ob og face mask ug dili pa igo, atong sapawan pa sa face shield aron
paniguro gyud nga dili kalusot ang Covid 19. Pero karon gi-ingnan na usab kita
nga dili gyud diay sigurado nga proteksyOn ang face shield, kuyaw pa kini sa
disgrasya.
Niay bag-ong komentaryo nga karon
Enero 2021 duna na untay bakuna gikan sa Pfizer nga moabot sa nasod, apan wa
kugihi ni Health Secretary Francisco Doque III og himog mga dokumento aron
mahingpit ang kasabutan ug pagpalit. Ang Singapore mag-una na hinuon sa
pagdawat sa mga bakuna nga maoy labing unang napalgan nga epektibo batok sa
Sars-CoV-2, kagaw sa coronavirus disease. Duna na untay makaginhawa gikan sa
grabeng quarantine nga gisugdan niadto pang Marso. Dili baya tiaw ang gidugayon sa quarantine, labina sa
mga batan-ong 15 anyos paubos ug senior citizens nga nagpanuigon og 65 anyos
pataas.
Dia pa. Nagkalandrakas ang mga
tubag sa gobiyerno kalabut sa pamahayag ni Presidente Rodrigo Duterte nga
daghang mga sundawo, apil ang mga sakop sa Presidential Security Group (PSG),
nga nabakunahan batok sa Covid-19. Gibarugan ni Food and Drug Administration
(FDA) Director General Eric Domingo nga supak sa balaud ang paghimo, pagpamalit
gikan sa gawas, pagbaligya ug distribusyon sa wala tugoti nga mga bakuna ug
tambal. Wa pay bisan unsang klase sa bakuna kun vaccine ang nahatagan og
emergency use authorization dinhi sa nasod. Iyang ipa-imbestigar ang
pagpamakuna sa mga sakop sa PSG nga miangkon nga nagpabakuna na sila batok sa
Covid-19. Wala sila musolti kon unsa ang brand apan suma sa Presidente nga
gikan sa Sinopharm sa China ang bakuna.
Samtang and FDA ug ang Department
of Health (DOH) mi-insister nga illegal ang pagamit sa bisan unsang bakuna sa
pagka-karon apan gidepensahan kini sa Malacanang. Sumala sa tigpamaba sa
presidente nga si Harry Roque nga walay nalapas nga balaud ang mga sakop sa PSG
kay donasyon ang maong mga bakuna. Namahayag usab ang ubang mga medical experts
nga mahimo ang pagamit sa bakuna o bisan unsang tambal kon gikinahanglan kaayo
sama sa pagprotihir nga dili matapatan sa Covid-19 si Presidente Duterte.
