Usahay dili kita dayon motoo kung maayo ba ang gisugyot sa usa ka dakong lider sa atong nasud hilabi na kung usa ka elective official tungod lagi sa politika. Bisan maayo paminawon ang iyang gisugyot apan ato pang hunahuna-on pagmaayo kung angayan ba ning dawaton ang iyang opinyon kay lagi basin pamulitika ra diay ang tuyo sa iyang gidusong hunahuna.
Naay mga kongresista nga miduso
niining face-to-face classes hilabi na sa mga tulunghaan nahimutang sa mga
low-risk area sa COVID-19. Apan, usahay pud dili sab ta dayon motoo kung
mopasupot ang Department of Education sa ilang tubag kay naay mga higayon nga
ang gisulti sa ahensya sa edukasyon dili maoy nahitabo sa aktwal hilabi na
didto sa mga probinsiya.
Niining bag-o, miingon ang DepED
nga mopahigayon sugod karong Enero usa ka pilot run face-to-face classes. Kapin
sa usa ka libo ka mga tunghaan tibuok nasud ang gikatakdang mohimog mga klase
balik na sulod sa mga classrooms. Dinhi sa Central Visayas, aduna nay 89 ka mga
eskwelahan ang napilian nga mag-limited face-to-face learning. Nindot paminawon
kining maong sugyot ug plano. Kung imong
hunahunaon pagmaayo daghan gyud giagian mga kalisdanan hilabi na sa habig sa
mga ginikanan tungod niining modular learning nga giingon sa DepEd sayon ra nga
pamaagi. Daghan nang mga ginikanan
akong nahinabi nga wala gyuy nakat-onan ang ilang mga anak sa modular learning.
Apan, giklaro hinuon sa direktor
sa DepEd-7 Dr. Salustiano Jimenez nga gikinahanglan nga moagi sa una sa proseso
ang mga tunghaan sa dili pa matugtan mag face to face classes ang mga kabataan.
Adunay resolution sa Parents and Teachers Association PTA, local government
units, ug mismo sa mga ginikanan. Apil sa plano, duha ka adlaw lang ang
pagtambong sa klase ug 50% lang sa mga estudyante ang tugotan nga makaapil. Ang
mga eskwelahan kinahanglan nahasubay usab ang desensyo sa health protocols.
Uyon ra baya unta ko nga ibalik
na sa face-to-face classes ang mga tinun-an nga pinasubay sa health protocols.
Apan ang akong gikabalak-an nga dili na pud mahan-ay pagmaayo inig implimintar
niini sa DEpEd. Admitido ang DepEd nga mahaglahi ang reaksyon sa mga sektor
kalabot sa lakang sa ahensya, adunay mihangop aduna usay nahadlok.
Raba, simbako dunay mahitabo nga
covid transmission sa mga eskwelahan dali ra gyud kaayo makakuyanap. Niining
panahona misugod na rabag kisaw ang lihok sa umaabot nga piniliay. Basin anaa
na pud mga politiko ang mo-epal niining maong plano. Seguro sa mga dapit nga
walay COVID-9 mahimo ra seguro kini apan sa mga tunghaan nga nahimutang sa
peligro sa virus or dunay history sa kagaw murag kaduha duhaan pa gyud kining
face-to-face classes. Ang mga bata raba giisip nga super spreader sa virus nga
mahimong motakod sa ubang miyembro sa pamilya inig pauli ilabi na sa mga apohan
nga vulnerable kaayo sa balatian.
Isip ginikanan, dili nako
ipanimpalad ang kinabuhi sa bata aron lang palabihon ang edukasyon. Gawas pa,
dili man pinugsanay ang face to face diin kadtong mag modular ug mag online
mahimo ra mopadayon. Sa pagka karon dili pako sigurado kung unsay sangpotanan
niini sa implimintasyon. Importante man
ang edukasyon pero mas importante ang kinabuhi nga angayan panalipdan.
Samtang wala pay bakuna ug tambal
walay kompyansa. Padayong gihugtan ang safety health protocols sama sa
facemask, faceshield, panghugas sa kamot ug social distancing. Kaway-kaway sa
kamot, bow, fist bump ug siko sa siko hulip sa lamano ug biso-biso agig
pagtimbaya. Videoke/Karaoke sa sayong kagabhion, gidili sa adlaw aron dili madisturbo
ang kabataan sa modular learning anaa sa panimalay.
