Ania na pud gisang-at nga balaudnon nga maghatag og cash incentives o hinabang o ayuda ngadto sa halos tanang sektor sa katilingan. Sentro gihapon sa gihapin nga rason ang coronavirus disease (Covid-19) pandemic. Maingon nga extension ni sa Social Amelioration Program (SAP) nga gipanghatag sa milabayng tuig 2020 nga gikagubtan sa daghang mga anomaliya sa gikan sa mga barangay opisyales sa halos tanang probinsya sa nasud.
Si kanhi House Speaker Allan
Peter Cayetano ang miduso sa maong balaudnon nga gisuportaran sa iyang nga
kaalyado. Gitawag kinig Bangon Pamilyang Pilipino. Buot tabangan sa maong
balaudnon ang mga pamilyang apektado sa pandemya nga makadawat og P1,500 matag
individual o P10,000 sa tibuok pamilya o asa ang labing dako.
Pagkanindot lagi unta aning
balaura kung maaprobar. Dili nalang ko mangutana kung duna bay igong pundo ang
kagamhanan kay mapangitaan man kinig pamaagi. Dili nalang pud ta mobasol sa mga
opisyales sa barangay nga mihimog binuang niadtong SAP kay nag-atubang naman
silag kaso karon. Dako pa ang akong pagsalig sa atong justice system sa
Pilipinas bisan naa kitay daghang madunggan gikan sa mga biktima nga nangayo og
hustisya.
Ang ako ani kay misugod na ra bag
kisaw ang mga politiko karon tungod sa
nagkaduol na nga eleksyon. Mismo si Sen. Manny Pacquiao miangkon nga daghang
corrupt nga mga pulitiko. Subo kaayo palandungon bisan di tanan apan kasagaran
sa atong mga pulitiko di kasaligan. Ang tuyo ni Cayetano salbaron ang katawhan
gikan sa kakabus pinaagi sa cash assistance. Ang mga kuwalipikado ra ba aning
balaudnon ang poorest of the poor o pinaka-pobre, sama sa senior citizens,
persons with disability, solo parents, displaced o retrenched workers o nawad-an
o natangtang sa trabaho, medical frontliners, pamilya sa overseas Filipino
workers, wala makadawat og hinabang gikan sa gobiyerno pagsugod sa pandemya,
mga tawo nga naghupot og national ID system ug vulnerable sectors.
Dili malalis nagkinahanglan pa
gyud og ayud ang katawhan gikan sa gobyerno aron lagi intawon makabangon sa
mikaliring nga ekonomiya. Dia pay misulod nga isyu sa Swine Fever nga
nakaapektar sa mga nagnegosyo og baboy. Apan akong hangyo sa mga politiko
ipadaplin sa gyud una ang politika niining panahona sa atong pagkumbati sa
COVID19.
Sa among lungsod sa Ubay, dako
gyud akong saludo sa MIATF gipangulohan ni Dra. Jasmin Jumao-as kuyog sa among
halangdong mayor si Mayor Dodong Costan Reyes ug ni Bise-Mayor Victor Bonghanoy
uban sa mga sakop Sangguniang Bayan sa pagpakusog pa sa contact tracing nunot
niining misaka nga kaso sa COVID19 sa among lungsod. Si Cong. Aris Aumentado
kuyog sa iyang kapikas si Madame Vanessa Vanvan Aumentado miayuda og mga
pagkaon ug aid assistance alang niadtong mga naigo mga residente sa granular lockdown sa Brgy. Poblacion,
Brgy. Fatima ug Brgy. Tapon.
Niining bag-o, gimanduan ni
Presidente Rodrigo Roa Duterte ang mga kawani sa gobyerno nga seguradohong
hapsay ang paghatod sa mga coronavirus disease 2019 (COVID-19) vaccines kun
moabot na kini sa nasud atol sa gipahigayong Inter-Agency Task Force for the
Management of Emerging Infectious Diseases (IATF-EID) Meeting sa Malakanyang
niadtong Pebrero 8.
Gidugang pa sa Presidente nga
angay mohatag ang Philippine National
Police (PNP) og mga escorts aron maseguro nga paspas nga mahatod ang mga bakuna
sa mga storage facilities. Gisugdan ang simulation exercise sa pag-abot sa mga
bakuna sa Ninoy Aquino International Airport (NAIA) Terminal 2 diin didto moagi
ang mga bakuna sa Customs clearance.
Apil usab sa ipahigayong simulation ang pagbalhin sa mga bakuna sa
storage facilities sa nasud sa dili pa kini padayong gamiton.
