Ang bisaya nga taga Butuan City ug sakop sa Philippine Military Academy Hinirang Class 0f 1987 nga si Major General Debold Sinas mi-asumir isip bag-ong hepe sa PNP sugod sa Nobiyembre 10, 2020 human gitudlo ni Pres. Rodrigo Duterte mipuli sa mo-retiro nga si PNP Chief Camilo Cascolan. Si Sinas kanhi direktor sa Police Regional Office (PRO)-7 sa wala pa siya nadestino isip direktor sa National Capital Regional Police Office (NCRPO).
Taliwala sa iyang pagkapili maoy
mangulo sa kapin 200 mil ka mga polis sa Pilipinas, wala mawala ang mga
pangutana dihang iyang gilaktawan ang duha nga mas taas nga mga opisyal, silang
Lieutenant General Guillermo Eleazar, nga nagpaukyab sa publiko isip hepe sa
Joint Task Force (JTF) Covid Shield, ang tig-umol sa mga lagda sa pagpauli sa
natanggong mga molupyo, ug Lieutenant General Cesar Binag.
Sa dihang milingkod siya isip
hepe sa NCRPO, gikiha siya sa Mayo 2020 uban sa 18 ka mga police official
tungod sa paglapas sa quarantine protocol dihang napakyas siya sa pagsanta sa
mañanita alang sa iyang ika-55 ka tuig pagsaulog sa iyang adlawng natawhan
didto sa Camp Bagong Diwa in Taguig City dihang ang Metro Manila ubos pa sa
enhanced community quarantine . Nakaplagan sila si Sinas ug uban pa nga
nakalapas sa City Ordinance No. 12 sa Taguig City, nga nagmando sa pagsul-ob sa
face masks sa publiko.
Sa nahimo pa siyang hepe sa
Police Regional Office sa Central Visayas daghan si Sinas nahimong maayo ilabi
na sa kampanya batok illegal nga drugas diin kapin sa P1 bilyong illegal drugs
ang nasakmit ug pagpitol sa mga nagpabadlong nga mga polis ug uban pa. Apan,
wala pud siya makalikay sa gipasangil kaniya sa duguong mga kontrobersiya nga
iyang gibilin sa Sugbo ug Central Visayas. Apil sa gipasangil nga mga bulilyaso
niya sa Sugbo ang kamatayon sa duha ka polis nga gidudahang gigamit sa ilang
kadagkoan alang sa extrajudicial killings (EJKs): Ang una napatay dihang
giingong nisuway pagbanhig sa opisyal sa barangay sa Dakbayan sa Sugbo; ug ang
ikaduha napatay sa Dakbayan sa Carcar sa habagatang Sugbo human giingon ni
Sinas nga naunay sa iyang armas sa Pinamungajan, kasadpang Sugbo.
Usahay, dunay mga kasaypanan nga
mahimo rang palabyon. Dili husto nga kalimtan lang ang mga maayong nahimo sa
usa ka tawo tungod lang sa gamay o usa niya ka kasaypanan. Tanang tawo mohangyo
man o mangayo man og konsiderasyon, dili ba diay kini mahimo kang Sinas? Tinuod
dunay mga nanaway kang Sinas tungod sa nahitabo, tingali bunga kadto sa kainit
sa ulo sa mga tawo epekto sa mga lockdowns. Apan tungod ba sa iyang “mañanita”
dili na ba diay siya angayan nga pangulohan ang organisasyon? Makatarunganon ba
nga hikawan ang PNP og maayo ug makamaong lider?
Gidepensahan siya ni Presidente
Rodrigo Duterte ug gipabilin sa katungdanan kay siya “good and honest man.” Si
Presidential Spokesperson Harry Roque niingon dugay nang gidayeg ni Duterte si
Sinas sa iyang natampo sa gubat batok sa drugas sa iyang administrasyon.
Usab, ang pagkatudlo ni Police
Major General Debold Sinas isip bag-ong Chief of the Philippine National Police
(PNP) gihangop ni Mayor Edgardo Labella sa Dakbayan sa Sugbo isip kanhi kini
direktor sa Police Regional Office (PRO)-7.
Matud ni Labella, dako niyang kalipay ug dungog nga ang kanhi direktor
sa PRO-7 maoy gitudlo ni Presidente
Rodrigo Duterte isip pinakataas nga opisyal sa kapolisan. Si Labella nidayeg
kini sa dedikasyon ug katakos ni Sinas sa iyang trabaho.
